រដូវប្រមូលផល តម្លៃស្រូវទាបខ្ពស់ទៅតាមតំបន់ ក្រសួងជំនាញចេញមុខពន្យល់បង្ហាញ

រាជធានីភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ បានច្រានចោល និងចាត់ទុកព័ត៌មានដែលផ្សព្វផ្សាយតាមបណ្តាញសង្គមហ្វេសបុក ជុំវិញតម្លៃស្រូវចុះថោក ថាជារឿងមិនពិត និងផ្ទុយពីការណ៍ដែលក្រសួងជំនាញមួយនេះ កំពុងយកចិត្តទុកដាក់ធ្វើ ដើម្បីភាពល្អប្រសើរនៅក្នុងតម្លៃនៃទីផ្សារកសិកម្ម ពិសេសចំពោះតម្លៃស្រូវក្នុងរដូវប្រមូលផល។

យោងតាមរយៈសេចក្តីប្រកាសព័ត៌មាន ចុះថ្ងៃទី១៧ ធ្នូ ២០១៩ របស់ក្រសួងខាងលើ បានគូសបញ្ជាក់ជូនសាធារណៈជនថា ចំពោះតម្លៃស្រូវរបស់បងប្អូនប្រជាពលរដ្ឋនៅតាមបណ្តាខេត្ត ពិសេសខេត្តជាប់ព្រំប្រទល់ដែនជាមួយនឹងប្រទេសថៃ មិនធ្លាក់ថ្លៃចុះថោក ដូចការផ្សព្វផ្សាយតាមបណ្តាញសង្គមនោះទេ គឺតម្លៃស្រូវមានតម្លៃសមរម្យ លើកលែងតែស្រូវអន់គុណភាពប៉ុណ្ណោះ។

ក្រសួងជំនាញផ្នែកវិស័យកសិកម្ម បានសង្កត់ធ្ងន់ថា កន្លងទៅថ្មីៗនេះ មានបណ្តាញទំនាក់ទំនងសង្គមមួយចំនួនបានរិះគន់ ក៏ដូចជាផ្តល់យោបល់ទៅក្រសួងកសិកម្ម ពាក់ព័ន្ធតម្លៃស្រូវចុះថោក នៅតាមបណ្តាខេត្តមួយចំនួននៅជាប់ព្រំដែនថៃ ដូចជា ខេត្តបន្ទាយមានជ័យ បាត់ដំបង និងពោធិ៍សាត់ ជាដើម។ ជុំវិញការលើកឡើងទាំងអស់នោះ ក្រសួងបានធ្វើការច្រានចោល និងចាត់ទុកថាជាព័ត៌មានមិនពិត ព្រោះខណៈមន្ត្រីបច្ចេកទេសរបស់ក្រសួងកសិកម្ម ចុះជួយរកទីផ្សារ និងរក្សាតម្លៃឲ្យសមស្របទៅនឹងតម្លៃនៃវត្ថធាតុដើម និងថ្លៃពលកម្មដែលប្រជាកសិករបានចំណាយ នៅក្នុងការបង្កបង្កើនផល។

នៅក្នុងលិខិតដដែលនេះ ក៏បានបញ្ជាក់បន្ថែមថា ក្នុងវិធានការអន្តរាគមន៍ រាជរដ្ឋាភិបាលកម្ពុជា បានបញ្ចេញសាច់ប្រាក់ចំនួន៥០លានដុល្លារអាមេរិក ក្នុងគោលដៅដើម្បីរក្សាស្ថិរភាពថ្លៃ និងប្រមូលទិញស្រូវពីប្រជាកសិករ យកមកស្តុកទុក កិនកែច្នៃសម្រាប់នាំចេញ។

សូមជម្រាបដែរថា ពាក់ព័ន្ធបញ្ហាខាងលើ នៅថ្ងៃទី១៩ ខែធ្នូ ឆ្នាំ២០១៩ ខាងមុខនេះ អង្គភាពអ្នកនាំពាក្យរាជរដ្ឋាភិបាលកម្ពុជា នឹងរៀបចំសន្និសីទសារព័ត៌មានស្តីពី វិធានការរក្សាតម្លៃឲ្យបានសមរម្យក្នុងរដូវប្រមូលផលស្រូវ។

ជាមួយនឹងសេចក្តីជូនដំណឹងរបស់អង្គភាពអ្នកនាំពាក្យរាជរដ្ឋាភិបាល លោកបណ្ឌិត យ៉ង សាំងកុមារ អតីតប្រធានអង្គការកសិកម្មសេដាក និងបច្ចុប្បន្នជាប្រធានគណបក្សប្រជាធិបតេយ្យមូលដ្ឋាន បានសំណេរនៅលើបណ្តាញសង្គមយ៉ាងខ្លីថា «ល្អ តែដូចជាចង់ហួសពេលហេីយ។ កសិករលក់ស្រូវជិតអស់ហេីយ»៕